Журналист, акын жана аткаруучу Сонунбү Кадырова 59 жаш курагында каза болду. Бул туурасында Маданият, маалымат жана жаштар саясаты министрлигинен билдиришти.
Ал көп жыл тележурналистикада иштеген.
Кадырова 1966-жылдын 8-февралында Алай районуна караштуу Бүлөлү айылында туулган.
1981-1985-жылдары Жалал-Абад педагогикалык окуу жайынын мектептер бөлүмүн бүтүргөн. 1997-жылы Кыргыз улуттук университетинин журналистика факультетин аяктаган. Эмгек жолун 1985-1988-жылдары мектепте мугалим болуп баштаган. Бирок өмүрүнүн негизги бөлүгүн тележурналистикага арнап, коомчулукка таанылган теледолбоорлорду алып чыккан.
1997-жылдан ушул күнгө чейин Улуттук телерадиокорпорацияда редакторлук кызматты аркалап, көптөгөн ири телеберүүлөрдү көрүүчүлөргө тартуулаган.
"Кадырова "Алтын тизме", "Замандаш", "Айыл ажары" сыяктуу телеберүүлөрдү элдин сүймөнчүлүгүнө айландырды. 2019-жылдан тартып "Абаз" теледолбоору аркылуу чыныгы таланттарды элге таанытып, жаштардын чыгармачылык жолуна багыт берди. 2023-жылдан тартып өлкөнүн 18 районун кыдырып, "Ыр кесе" берүүсүн кайрадан жандандырып, элибиздин руханий жана адеп-ахлактык өнүгүүсүнө салым кошту", — дешти министрликтен.
Кадырова Кыргыз Республикасынын Жазуучулар союзунун мүчөсү болгон, "Сонун дүйнө", "Сүйүнчү", "Бар болуңуз" аттуу китептердин автору.
Пикирлер (0)
Пикир жок. Сиз биринчилерден болушуңуз мүмкүн