Бишкек шаарында активисттер дарыгерлер үчүн обсервация уюштурушту. Бул тууралуу продюсер Мирлан Даанышман “Медиа центр” мультимедиалык-маалымат агенттигине билдирди.
Анын айтымында, өкмөткө активисттер жардам сунуштап, жыйынтыгында дарыгерлерге обсервация уюштурушкан.
“Кызыл аймактарда иштеп жаткан 10 дарыгерге “Улукман” обсервациясын уюштуруп, ак халатчандарды жатакана, тамак-аш жана күнүмдүк турмушта керектелүүчү нерселер менен камсыздап жатабыз. Республикалык штабдан 18 дарыгер бар экенин айтканда, алардын онун кабыл алганбыз.
Ал эми каржы маселеси командабыздагы ондой улан-кыздын жеке эсебинен болду. Мындан тышкары коомдо ыктыярчы адамдар абдан көп болуп жатат. Тамак-аш маселесине келгенде мен тамак алып барайын деп сурангандар бар. “Шоро” компаниясы сууларын алып келди, эмеректерди бир жигит алып келип берди. Биздин обсервациядагы ыктыярчылар карапайым элдин эсебинен иштеп жатат”, - дейт ал.
Ошондой эле ал дарыгерлердин келгенине 10 күндөй болуп калганын айтып, калган бир жумалык убактысын Ысык-Көлгө уюштурууну пландап жатканын кошумчалады.
Пикирлер (0)
Пикир жок. Сиз биринчилерден болушуңуз мүмкүн