Бишкек комендатурасы Ленин РИИБнын башчысын кызматтан алды

Бишкек шаарынын комендатурасынын чечими менен Мадияр Кулуев Ленин райондук ички иштер бөлүмүнүн башчысы кызматынан алынды. Бул тууралуу ал бүгүн, 7-апрелде журналисттерге билдирди.

Анын айтымында, өзүнүн кызматтан четтетилишинин себептери жөнүндө ага маалымат берилген эмес: “Мени эмне үчүн кызматтан четтеткенин түшүнгөн жокмун, себебин дагы айтышкан жок. Мен 1986-жылдан бери милицияда иштеп келе жатам. Алар мени милдетин аткара алган жок деп айтышты”, – деди Кулуев.

Мындан тышкары ал сотко жана мамлекет башчы Сооронбай Жээнбековго кайрыла турганын кошумчалады. “Мен сот органдарына жана президентке кайрылам. Мен ордум үчүн эмес, башаламандык үчүн тынчсызданып турам”, – деди ал.