Кыргызстандын ички дүң продукциясынын көлөмү 6 айда 228 млрд сомду түздү

Кыргызстандын ички дүң продукциясынын көлөмү акыркы 6 айда 228 млрд сомду түздү. Бул тууралуу экономика министри Санжар Муканбетов 30-июлдагы брифингде билдирди. 

Анын айтымында, алты айдын эсеби менен ички дүң продукциянын көлөмү 5,3%га кыскарып, 228 млрд сомду түздү. 

"Өлкөбүздүн экономикасынын өсүшү 94,7%ды түздү. Мында өнөр жайыбыз нейтралдуулукту сактап, 0,1% гана өстү. Ал эми айыл чарба сектору 1,6%га өсүшүн көрсөттү. Эң чоң төмөндөө курулуш тармагында (10%) жана кызмат көрсөтүү тармагында (9,2%) байкалды”, - деп билдирди Санжар Муканбетов. 

Анын айтымында, эл аралык уюмдардын баалоосу боюнча экономиканын өнүгүшү 3-10%га чейин кыскарары белгиленген. Ал эми Дүйнөлүк соода уюму товар алмашуу дүйнөдө 30%га чейин кыскарат деген божомол чыгарган.