УКМК 2021-жылдын 29-октябрында Министрлер кабинетинин төрагасынын орун басары – Кыргыз Республикасынын Улуттук коопсуздук мамлекеттик комитетинин төрагасы генерал-лейтенант Камчыбек Ташиев «Рособоронэкспорт» АК жетекчиси Александр Михеев менен «Ала-Арча» мамлекеттик резиденциясында жолугушканын маалымдайт.
Жолугушуунун жүрүшүндө тараптар Кыргыз Республикасы менен Россия Федерациясынын ортосундагы аскердик-техникалык кызматташтыкты өнүктүрүүгө байланышкан маселелерди кеңири талкуулашты.
Эки жак кыргыз тараптын «Рособоронэкспорт» АК Ми-17В-5 тик учагын сатып алуу, Ми-8 МТВ тик учактарын капиталдык оңдоо жана реконструкциялоо, аларга тетиктерди жеткирүү жана агрегаттарды оңдоо боюнча макулдашышты.
Жолугушуунун негизги жыйынтыгы катары КР УКМК Чек ара кызматынын керектөөлөрү үчүн «Орлан-10Э» учкучсуз учуучу аппараттардын көп функционалдуу комплекстерин Кыргыз Республикасы тарабынан сатып алуу боюнча келишимге кол коюу болду.
Белгилей кетүүчү нерсе, аталган аскердик-техникалык буюмдар Кыргыз Республикасы тарабынан республикалык бюджеттин эсебинен сатып алынат.
Пикирлер (0)
Пикир жок. Сиз биринчилерден болушуңуз мүмкүн