Жээнбек Кулубаев Алматыда КМШ ТИМ башчыларынын кеңешине катышты

Бүгүн тышкы иштер министри Жээнбек Кулубаев Казакстандын Алматы шаарында КМШга мүчө мамлекеттердин тышкы иштер министрлер кеңешинин жыйынына катышты.

Ведомстводон маалымдашкандай, жолугушууда делегация башчылары эл аралык күн тартибиндеги актуалдуу маселелер боюнча пикир алмашып, КМШ алкагындагы саясий, соода-экономикалык жана маданий-гуманитардык кызматташтыктын учурдагы абалын жана келечегин талкуулашты.

Жыйындын жүрүшүндө тышкы саясат, коопсуздук, ошондой эле сот-укуктук жана маданий-гуманитардык чөйрөлөрдөгү кызматташтыктын негизги аспектилери каралды.

Жолугушууга катышуучулар КМШнын өкмөт башчылары кеңешинин жана мамлекет башчылары кеңешинин алдыдагы жыйындарында бекитүүгө коюла турган бир катар документтерди жактырышты.

Иш-чаранын жыйынтыгында КМШга мүчө мамлекеттердин тышкы иштер министрлер кеңешинин кезектеги жыйынын үстүбүздөгү жылдын 9-октябрында Тажикстандын Душанбе шаарында өткөрүү чечими кабыл алынды.